ՍՏԵՓԱՆԱԿԵՐՏ, 11 մարտի. /Նովոստի-Արմենիա/. ԼՂՀ պաշտպանության նախարարության մամուլի ծառայությունը հինգշաբթի հայտնում է Ադրբեջանի զինծառայողների կողմից հրադադարի ռեժիմի խախտման մասին:
Հաղորդագրության համաձայն` մարտի 10-ի լույս 11-ի գիշերը և այսօրվա ընթացքում Լեռնային Ղարաբաղի Հանրապետության և Ադրբեջանի Զինված ուժերի շփման գծի մի շարք հատվածներում արձանագրվել են հրադադարի ռեժիմի խախտման դեպքեր:
«Հակառակորդը փոքր տրամաչափի հրաձգային զենքերից և դիպուկահար հրացաններից գնդակոծել է Հորադիզ, Կարախանբեյլի, Սեյսուլան, Թալիշ և այլ ուղղություններում տեղակայված ղարաբաղյան դիրքապահների հենակետերը»,- ասվում է հաղորդագրության մեջ:
Մամուլի ծառայությունից նշեցին, որ Ղարաբաղի Պաշտպանության բանակի զինծառայողների կողմից ձեռնարկված պատասխան գործողություններից հետո հակառակորդը լռել է:-0-
