ԵՐԵՎԱՆ, 6 սեպտեմբերի. /Նովոստի-Արմենիա/. Ղարաբաղի անկախության ճանաչումն այսօր ժամանակի պահանջն է, երկուշաբթի լրագրողներին ասաց «Ժառանգություն» խորհրդարանական խմբակցության անդամ Լարիսա Ալավերդյանը։

«Ժառանգություն» ընդդիմադիր խմբակցությունը ՀՀ ազգային ժողովի խոսնակ Հովիկ Աբրահամյանին առաջարկել է հոկտեմբերի 5-ին արտահերթ քննարկել «ԼՂՀ անկախության ճանաչման մասին» օրինագիծը: Խմբակցությունը տվյալ օրինագիծը խորհրդարան է ներկայացրել դեռ 2007թ.-ին, սակայն այդ ժամանակվանից պատգամավորները հրաժարվում են այն օրակարգ ներառել:

Կանոնակարգի համաձայն, հերթական նստաշրջանի յուրաքանչյուր երկրորդ քառօրյա նիստում քննարկվում է ընդդիմադիր խմբակցության կողմից անտահերթ ճանաչված Ազգային Ժողովի օրինագիծ կամ որոշում, եթե այդ նախագիծը շրջանառվում է, և որի վերաբերյալ ստացվել է գլխամասային հանձնաժողովի եզրակացությունը կամ եզրակացության ժամկետն արդեն լրացել է։ 

«Լեռնային Ղարաբաղի Հանրապետության անկախության ճանաչումն այսօր ճիշտ որոշում է քաղաքական տեսանկյունից, քանի որ, վերջիվերջո, կստեղծվի իրավիճակ, երբ պատգամավորներն իրենց վրա կվերցնեն պատասխանատվությունը անորոշության վիճակի համար»,- ասաց Ալավերդյանը։

Ըստ նրա, հանգիստ համաձայնելով խորհրդարանի մեծ օրակարգում հայ-թուրքական արձանագրությունների վավերացման հարցի ընդգրկմանը, պատգամավորները պարտավոր են դրանում ընդգրկել նաև Ղարաբաղի անկախության ճանաչումը, ինչը համաչափ և համարժեք մոտեցում կդառնա։

Ինչպես կարծում է պատգամավորը, դա ոչ միայն անհրաժեշտություն է Հայաստանի արտաքին քաղաքականության համար, այլ նաև Ղարաբաղի վերաբերյալ ՄԱԿ-ի Ադրբեջանի կողմից Գերագույն Վեհաժողովին ներկայացված բանաձևի պատասխանը կլինի։

Ադրբեջանական լրատվամիջոցների տեղեկությունների համաձայն, Բաքուն սեպտեմբերի 9-ին ՄԱԿ-ի ԳՎ 65-րդ նստաշրջանում քվեարկության կներկայացնի «Միջազգային հումանիտար օրենքի և միջազգային չափորոշիչների նորմերի պահպանումը մարդու իրավունքների ոլորտում Ադրբեջանի բռնազավթված տարածքներում» բանաձևի օրինագիծը։

ՀՀ ԱԺ մարդու իրավունքների և հանրային հարցերի մշտական հանձնաժողովի փոխնախագահ, Հայաստանի Հանրապետական կուսակցության անդամ Ռաֆիկ Պետրոսյանն իր հերթին նշեց, որ տվյալ հարցը պետք է լուծվի միայն ԵԱՀԿ Մինսկի խմբի ծրագրած պայմանավորվածությունների շրջանակներում, և ոչ մի դեպքում՝ միակողմանի կարգով։

«Նման որոշում (Ղարաբաղի անկախության ճանաչումը՝ «Նովոստի-Արմենիա») այժմ չի կարելի ընդունել, քանի որ այն կարող է էական վնաս հասցնել Հայաստանին։ Ճանաչումը հնարավոր է միայն այն դեպքում, եթե բարենպաստ պայմաններ ստեղծվեն, որոնք հիմա չկան»,- ասաց Պետրոսյանը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-