ԵՐԵՎԱՆ, 21 հուլիսի./Նովոստի-Արմենիա/. Վերջին ամսվա ընթացքում Հայաստանն արդեն վեցերորդ անգամ մասնակիորեն առանց Ինտերնետի էր մնացել։
Ինչպես «Նովոստի-Արմենիա» գործակալությանը հայտնեց FiberNet Communications մեծածախ ինտերնետ պրովայդերի մամուլի քարտուղար Միքայել Բալայանը, վթարը տեղի է ունեցել Վրաստանի տարածքում՝ Քութայիսի քաղաքի մոտ։
«Մեզ միայն հայտնի է, որ վթարը մեխանիկական բնույթ է կրում, սակայն կապի դադարի առավել մանրամասն պատճառներն անհայտ են»,- ասաց Բալայանը։
Ըստ նրա՝ մասնագետներն արդեն վթարի վայրում են գտնվում և զբաղվում են անսարքության վերացման հարցերով։
Բալայանը նշեց, որ վրացի գործընկերները խոստացել են երկու ժամվա ընթացքում վերականգնել կապը։
Վթարի արդյունքում Վրաստանում նաև տուժել են մեծածախ ինտերնետ կապի այլ հայկական պրովայդերները՝ «ԱրմենՏելը» և GNC-Alfa-ն, որոնք Վրաստանի վթարի հետ կապված ուղու մասնակի կորուստ են գրանցել, սակայն ինչպես «Նովոստի-Արմենիա» գործակալությանը հաղորդեցին երկու ընկերություններից, այլընտրանքային ուղղությունների հաշվին հաճախորդները հատուկ անհանգստություն չունեն։ -0-
