ԵՐԵՎԱՆ, 11 մարտի. /Նովոստի-Արմենիա/. Եվրամիությունը պատրաստ է աջակցություն ցուցաբերել Հայաստանին ղարաբաղյան հակամարտության կարգավորման և Թուրքիայի հետ հարաբերությունների բարելավման հարցում, ասաց Հայաստանում Եվրահանձնաժողովի պատվիրակության գործերի հավատարմատար Օննո Սիմոնսը ՆԱՏՕ-ի Խորհրդարանական Վեհաժողովի «Ռոուզ Ռոթ» սեմինարի ժամանակ։
Ըստ նրա՝ ղարաբաղյան հակամարտությունը «սառեցված և շատ անկայուն հակամարտություն է»։ Սիմոնսի խոսքերով՝ ԵՄ-ն կողմ է ԵԱՀԿ Մինսկի խմբի գործունեությանը և պատրաստ է իր աջակցությունն առաջարկել կողմերի ցանկության առկայության դեպքում։
Հայաստանում Եվրահանձնաժողովի պատվիրակության գործերի հավատարմատարն ընդգծեց, որ Եվրամիությունը կարևորում է նաև հայ-թուրքական հարաբերությունների բարելավումը և «պատրաստ է կողմերին ցուցաբերել ցանկացած խորհրդատվական և տեխնիկական աջակցություն»։
«Հայաստանը որքան շատ բան պատրաստ լինի անել, այնքան ԵՄ-ն ավելի մեծ աջակցություն է պատրաստ ցուցաբերել Հայաստանին։ Դա ԵՄ արտաքին քաղաքականության հիմնական սկզբունքն է»,- ավելացրեց Սիմոնսը։ -0-
