ԵՐԵՎԱՆ, 1 մարտի. /Նովոստի-Արմենիա/. «Դուո էլ տանգո» իտալական դուետը, որի կազմում են վիրտուոզ- ակորդեոնահար Մարիո Ստեֆանո Պյետրոդարկին և երիտասարդ կիթառահար Լուկի Լուչինին, մարտի 2 և 4 համերգներով հանդես կգան Երևանում, երկուշաբթի լրագրողներին հայտնեց ինքը մաեստրո Պյետրոդարկին:
Դուետի առաջին համերգը կկայանա մարտի 2-ին Երևանի Կոմիտասի անվ. Կամերային երաժշտության տանը, իսկ մարտի 4-ին դուետն արդեն կներկայացնի մեկ այլ երաժշտական ծրագիր, ավելի նեղ միջավայրում՝ մայրաքաղաքի երաժշտական ակումբներից մեկում:
Փետրվարի 27-ին արդեն կայացել է Պյետրոդարկու և Հայաստանի պետական երիտասարդական նվագախմբի համատեղ համերգը:
Մաեստրոյի խոսքերով, չնայած նման երաժշտության կատարման փորձի պակասին, սա չի խանգարել նվագախմբին հեշտությամբ կատարել իրենց առջև դրված խնդիրը:
«Հայ ժողովուրդը մշտապես գտնվում է շարժման, դինամիկայի մեջ: Սա զգացվում է ամեն ինչում: Քաղաքի փոփոխվող ճարտարապետությունը, համատարած շինարարությունը վկայում են անընդհատ նորարարության հանդեպ հայ ժողովրդի ձգտման մասին»,- ասաց Պյետրոդարկին՝ կիսելով Հայաստանի ու հայ ժողովրդի մասին իր տպավորությունները:
Նա ուրախությամբ նշեց, որ Հայաստան կատարած յուրաքանչյուր այցից հետո զգում է իր երաժշտության երկրպագուների թվի աճը:
Սա մաեստրոյի արդեն հինգերորդ այցն է Հայաստան, ավելի վաղ Պյետրոդարկին համերգներով հանդես է եկել Հայաստանում տարբեր երաժշտական ու կինոփառատոների շրջանակներում:
Դուետի մյուս մասնակից, երիտասարդ կիթառահար Լուկի Լուչինին, հաջողության հասնելով ոչ միայն Իտալիայում, այլև դրա սահմաններից դուրս, առաջին անգամ է գտնվում Հայաստանում: Նա ասաց, որ ցնցված է հայ ժողովրդի արտասովոր մշակույթից ու տաղանդից:
Լուչինիի խոսքերով, Փարաջանովի թանգարանն իր վրա անջնջելի տպավորություն է գործել: «Հայաստանում ամեն ինչ այնքան ներծծված է արվեստով ու ստեղծագործական մտքով: Իմ այստեղ գտնվելու այս կարճ ժամանակահատվածում ես հասցրեցի համոզվել դրանում»,- ասաց նա:
Դուետի համերգը կազմակերպվել է ՀՀ մշակույթի նախարարության աջակցությամբ, «Գոյ» գեղարվեստական թատրոնի ղեկավար Արմեն Մազմանյանի նախաձեռնությամբ:
Մազմանյանի խոսքերով, կամերային երաժշտության տանը դուետի ելույթի ընթացքում կկայանա նաև հայկական «Նաբիզ» քառյակի ելույթը: -0-
